Kwa mujibu wa Shirika la Habari la Hawza, zaidi ya wahadhiri 850 wa vyuo vikuu nchini Iran, wakiwemo maprofesa 68 bora wa kitaifa, wanasayansi 40 waliomo katika asilimia 1 ya juu duniani, wanasayansi 49 waliomo katika asilimia 2 ya juu duniani, wanasayansi 10 waliotajwa sana katika sayansi za jamii, maprofesa kamili 354 na maprofesa washiriki mashuhuri 315 nchini Iran, katika tamko moja wametangaza kumuunga mkono Kiongozi Mkuu wa Mapinduzi ya Kiislamu:
Matini kamili ya tamko ni kama ifuatavyo:
Kwa jina la Mwenyezi Mungu, Mwingi wa rehema, Mwenye kurehemu.
“Na sema, ukweli umefika na batili imetoweka; hakika batili ni yenye kutoweka.”
Kwa kuwapongeza wananchi watukufu na wastahimilivu wa Iran kwa maadhimisho ya Siku za Mwenyezi Mungu za Muongo wa Alfajiri (Dahe-ye Fajr), wananchi ambao kwa muda wa miaka 47 kwa busara na ujasiri wamesimama imara dhidi ya Shetani Mkubwa na washirika wake katili, na wamepata mafanikio makubwa na ya kushangaza katika nyanja mbalimbali, hususan katika sayansi na teknolojia, tunakumbusha mambo machache yafuatayo.
Dhamira ya kudumu ya wahadhiri na wanasayansi waaminifu wa Iran ni kufanikisha heshima, usalama na maendeleo ya taifa chini ya mfumo wa watu na wa Kiislamu. Kwa mtazamo wetu, uhuru wa kweli na usio na kifani wa Jamhuri ya Kiislamu ya Iran na kujinasua kutoka katika utawala wa wageni—ambao ni matunda ya damu ya mashahidi—umesababisha maendeleo ya kasi na ubora wa vyuo vikuu vya nchi, malezi ya wataalamu, na maendeleo makubwa ya kisayansi na kiteknolojia.
Sasa, kwa misingi ya busara ya pamoja, wajibu wa kihistoria mbele ya taifa, dhamira ya kidini na dhamiri yetu ya kisayansi, kwa msimamo thabiti na umoja kamili, tunatangaza misimamo ifuatayo kama agano la kitaifa:
1. Uongozi (Wilaya); Ngome Imara ya Mapinduzi:
Katika zama ambazo njama tata za ubeberu duniani—kuanzia vikwazo, ugaidi na mashambulizi ya kijeshi hadi vita vya vyombo vya habari, vita vya kiakili na uchochezi wa fitna—zinatumiwa kuvunja azma ya taifa tukufu la Iran, ngome pekee iliyo imara na isiyopenyeka ni umoja mtakatifu na uungaji mkono kamili kwa uongozi wa Imam Khamenei (Mwenyezi Mungu akilinde kivuli chake).
Katika tufani hii kali, msimamo pekee ulio imara unaobeba bendera ya kusema “hapana” kwa ubeberu ni Kiongozi mwenye hekima wa Mapinduzi ya Kiislamu. Yeye ni mbeba bendera wa mhimili wa mapambano na mfasiri wa azma ya umma ambao kamwe hautapiga magoti mbele ya nguvu za kishetani. Leo, kusikiliza na kufuata maelekezo ya kiongozi huyu mwenye busara, jasiri, mwenye mtazamo wa mbali na hekima, ni jukumu na wajibu wa kisheria wa dini, wa lazima na wa kihistoria, na ni agano la kudumu na mashahidi watukufu wa Mapinduzi, ambalo lilikuwa wasia wao wa kwanza na muhimu zaidi.
Kiongozi Mkuu wa Mapinduzi, mbeba bendera wa mhimili wa muqawama, mfasiri wa mapenzi ya Mwenyezi Mungu kwa umma, na ndiye rejea pekee ya kuamua njia ya heshima na uhuru wa Iran tukufu. Yeye si kiongozi wa watu katika eneo maalumu la kijiografia tu, bali ni mbeba bendera wa mhimili wa kimataifa wa muqawama, na ndiye msimamo pekee thabiti uliovunja haiba ya uongo ya Magharibi.
2. Onyo kwa Mafirauni wa Nyakati Hizi:
“Basi tukamkamata yeye na majeshi yake, tukawatupa baharini; basi tazama ulikuwaje mwisho wa madhalimu.”
Hatima isiyoepukika ya madhalimu wote katika historia—kuanzia Firauni hadi Nimrodi, na kuanzia Trump na Netanyahu hadi kila msaliti na kibaraka wa ndani au nje atakayethubutu kuvamia heshima ya Wilayat na uongozi wa Umma wa Kiislamu—ni dampo la historia. Taifa letu, kwa uelewa wa kina, linafahamu vyema kwamba kuulinda uongozi huu ni kuulinda Uislamu, Mapinduzi na Iran iliyoungana na yenye heshima.
Maadui wa Uislamu na Iran wafahamu kwamba njama yoyote, msimamo wowote au hatua yoyote yao inayolenga kuleta hofu, mgawanyiko au shambulio dhidi ya nafasi hii tukufu na mwanazuoni huyu mcha Mungu, itakabiliwa na moto wa ghadhabu ya pamoja na jibu kali na zito kutoka kwa taifa la Iran, Umma wa Kiislamu na watu wote huru duniani.
3. Kulaani Ugaidi Mpya na Onyo Dhidi ya Ufashisti Unaopinga Akili:
Sisi, jumuiya ya kielimu ya Iran, tunalaani uhalifu uliopangwa wa mawakala wanaohusishwa na Marekani na utawala wa Kizayuni, ambao ulisababisha kuuawa kishahidi na kupoteza maisha kwa zaidi ya raia 3000 wa Iran, uharibifu wa makusudi wa miundombinu muhimu, na kuchomwa moto Qur’ani Tukufu na maeneo matakatifu kama misikiti, shule na maktaba.
Katika kipindi hiki nyeti, tunawaita wahadhiri wote wa vyuo vikuu na wanafalsafa kuwa na umakini na uelewa wa hali ya juu zaidi. Dunia inashuhudia kuibuka kwa mwelekeo hatari na “ufashisti mpya” unaovaa sura ya haki za binadamu, ilhali kwa hakika ni adui mkubwa wa mantiki, uhuru wa mawazo, demokrasia ya kweli na aina yoyote ya mazungumzo huru ya kielimu. Mkondo huu, kwa kutumia zana kama vita vya kisaikolojia vya hali ya juu na utawala wa vyombo vya habari, unalenga kunyamazisha sauti ya ukweli na kutiisha mapenzi ya mataifa huru. Kukabiliana na shambulio hili la kila upande kunahitaji umoja, uzalishaji wa fikra za kimkakati na ulinzi hai wa mipaka ya uhuru wa kifikra na kielimu wa nchi. Tunaamini kuwa chuo kikuu chenye dhamira na kilicho huru ni ngome ya kukabiliana na giza hili jipya la kifikra.
Maadui wafahamu kwamba katika njia ya kuutetea Uongozi (Wilaya), hatuogopi wala hatuna shaka. Jibu letu kwa upumbavu wowote ni dhoruba itakayong’oa mizizi ya adui mwovu.
Pia tunataraji kwa viongozi na watendaji wote wa mihimili mitatu ya dola kwamba kwa moyo wa jihadi, juhudi maradufu za mchana na usiku, na kwa kutegemea uwezo mkubwa wa ndani na vipaji vya vijana, wachukue hatua madhubuti za kuondoa matatizo ya maisha ya wananchi, kupambana kwa uthabiti na ufisadi na uporaji wa rasilimali, na kuboresha hali ya kiuchumi ya taifa tukufu la Iran. Hadhi ya taifa hili lenye subira na ushujaa iko juu zaidi ya kuvumilia hali ngumu za maisha za sasa. Viongozi wafahamu kuwa uhalali wao unategemea huduma ya kweli na ufanisi katika kuendesha gurudumu la uchumi na ustawi wa jamii; kwa kuwa Iran yenye nguvu inahitaji uchumi hai unaotegemea uwezo wa ndani na utekelezaji wa uchumi unaotegemea maarifa ili kuvuka vikwazo dhalimu.
Na kwa Mwenyezi Mungu ndiyo tawfiki, na Kwake Yeye tunategemea.
Maoni yako